Nafarroako Unibertsitate Publikoak (NUP), kide duen UNITA aliantzaren esparruan, mugikortasunerako beste bi deialdi egin ditu ikasleentzat. Deialdietako baten bidez nazioarteko landa-destinoetan curriculumetik kanpoko praktikak eginen dira, eta abian da. Beste deialdiaren bidez, berriz, gradurako eta unibertsitate-masterrerako landa-mugikortasunak eginen dira, eta datozen egunetan argitaratuko da.
Ikasle batzuk NUPen.
Bi ekimenen xedea da UNITA aliantzaren lehentasunezko helburuetako bat lortzen laguntzea, hots, nabarmen areagotzea aliantzako kide diren herrialdeen arteko mugikortasun fisiko, konbinatu eta birtualak.
Udako praktikak nazioarteko landa-destinoetan
UNITA 2024 aliantzaren esparruan landa-mugikortasuneko curriculumetik kanpoko praktikak egiteko deialdiak aukera emango die NUPeko ikasleei, lehen aldiz, praktikak egiteko landa-udalerrietako erakunde eta enpresetan, aliantzak Portugalen, Frantzian, Italian eta Errumanian dituen unibertsitateen egoitzetatik gertu. Unibertsitateko ikasleen gaitasunak indartzeaz eta enplegagarritasuna hobetzeaz gain, unibertsitateak kokatuta dauden eskualdeen lurralde-garapenean laguntzea da helburua.
Egonaldiak gutxienez hiru astekoak eta gehienez lau hilabetekoak izanen dira, eta ekainetik irailera bitartean eginen dira. Iraupena zein den, parte-hartzaileak, unibertsitate hartzailean tutoretzapean egonen baita, dagokion laguntza jasoko du. Guztira, 100 postu baino gehiago eskaini dira bost herrialdetan. NUPek, deialdi honen esparruan, hiru postu eskaini ditu Nafarroako bi landa-destinotan, eta aliantzako gainerako unibertsitateetako ikasleei zuzenduta daude.
Nazioarteko ingurune bateko landa-mugikortasuna da UNITAren ekimenik berritzaileenetako bat Europako beste unibertsitate-aliantza batzuekin alderatuta. Programak sinergia berriak sortu nahi ditu hezkuntzan, ikerketan eta enpresa-espirituan eta aldeko eragin garbia izan nahi du Europa osoko landaguneetan eta mendialdeetan.
Postuen eskaintza katalogoan kontsultatzen ahal da. Interesa duten ikasleek esteka honen bidez eskatzen ahal dute parte hartzea. Epea datorren ostegunean, apirilak 18, amaituko da.
Aitorpen akademikoa duten ikastaro birtualak
UNITAREN esparruko mugikortasun-deialdiak, bestalde, aukera ematen die ikasleei birtualki ikasteko aliantzako kide diren unibertsitateek eskainitako irakasgaiak. Mugikortasun-formatu horri esker ikasleek ez dute joan-etorririk egin beharrik, eta NUPen ikasi ezin diren irakasgaiak eta ikasgaiak ikasteko aukera ematen du.
Deialdian parte hartzeko, ikasleek arduraldi osoan matrikulatuta egon behar dute graduko edo unibertsitate masterreko ikasketa ofizialetan 2023-2024 ikasturtean, eskaera aurkezteko unean, eta, orobat matrikulatu 2024-2025 ikasturtean eta mugikortasun birtualeko aldian, unibertsitate hartzailean. Baldintza gehigarri gisa, kasu bakoitzean eskatzen den hizkuntza-maila egiaztatu beharko dute.
Eskaintzaren barruan daude, batetik, zenbait jakintza-arlotako irakasgai espezifikoak, hala nola ingeniaritza, informatika, legeak eta abar, UNITA unibertsitateetan ematen diren graduko ikasketetan daudenak. Bestalde, aliantzako herrialdeetan hitz egiten diren hizkuntzei buruzko ikastaro espezifikoak eskaintzen dira (espainiera, frantsesa, italiera, portugesa, errumaniera), bai eta elkar ulertzean ere. UNITAk sustatutako ikasgai hori honela definitzen da: hizkuntza erromantzeetako hiztunen artean elkar ulertzeko gaitasuna nor bere hizkuntza mintzo delarik.
Ikasle bakoitzak unibertsitate bereko edo beste bateko hiru irakasgai eskatzen ahal ditu gehienez ere, eta 12 ECTS gehienez ere. Eskaintza osorik eta xehetasun guztiekin kontsultatzen ahal da katalogo birtualean.
UNITA – Universitas Montium
UNITA – Universitas Montium aliantza 2020an sortu zen, eta egun honako hauek osatzen dute: hamabi unibertsitate, eskubide osoko hamar bazkide (horien artean NUP 2023tik) eta bi erakunde elkartu. Beraz, 250.000 ikasleko eta 21.000 laguneko giza taldea irakasleen eta teknikari eta administrazioko langileen artean.
Honako hauek dira unibertsitate bazkideak: Barnealdeko Beirako Unibertsitatea eta Guardako Institutu Politeknikoa (Portugal); Zaragoza eta Iruñea (Espainia); Turin eta Brescia (Italia); Paue eta Adour eta Savoya Mont Blanc (Frantzia); Timisoarako Mendebaldeko Unibertsitatea (Errumania) eta Brasoveko Transilvania Unibertsitatea (Errumania). Honako erakunde hauek parte hartzen dute elkartu gisa: Mendebaldeko Suitzako Goi Mailako Eskola Espezializatua - HES-SO (Suitza) eta Yuriy Fedkovych Chernivtsi Unibertsitate Nazionala (Ukraina).
Horiek guztiek ezaugarri komun hauek dituzte: eskualde menditsuetan daude, beren herrialdeetako mugetatik gertu eta hizkuntza erromantzeak hitz egiten diren lekuetan.