Ramón Gonzalo García Nafarroako Unibertsitate Publikoko (NUP) errektorea buru izan da 528 ikasleri bekak emateko ekitaldian gaur, ostirala, abenduak 29. Ikasle horiek 2023-2024 ikasturtean nazioarteko mugikortasun programetan parte hartzen ari dira, 46 herrialdetan. Ikasle gehienak (386) Erasmus programakoak dira; 97, Palafoxekoak; 8, Martín de Radakoak; 13, aldebiko hitzarmenetakoak; 10, ISEPekoak; eta 14, Prestakuntza Solidarioko programetakoak.
Arrosadiko campuseko Fernando Remacha aretoan egin da laguntzak emateko ekitaldia, eta hitzaldiak eman dituzte Jorge Elso Torralba Nazioartekotzeko eta Lankidetzako errektoreordeak, Ignacio Terés Los Arcos Nafarroako Rural Kutxako presidenteak eta Ramón Gonzalo NUPeko errektoreak, zeinak ekitaldiari amaiera eman baitio. Dirulaguntzen zenbatekoa desberdina da atzerrian ikasturte osoa igaroko dutenentzat (50 ikasle osotara) eta seihileko baterako joan diren edo joanen direnentzat (315 udazkenekoan eta 163 udaberrikoan). Ramón Gonzalo NUPeko errektorearen hitzaldiak eman dio amaiera ekitaldiari.
Ezkerretik eskuinera: Ignacio Terés Los Arcos Nafarroako Rural Kutxako presidentea, Ramón Gonzalo García errektorea eta Jorge Elso Torralba Nazioartekotzeko eta Lankidetzako errektoreordea, bekak emateko ekitaldia hasi baino lehen.
Ikasturte honetan atzerriko unibertsitateren batean ikasiko duten ikasleetatik 331 emakumezkoak dira, eta gizonezkoak 197. Herrialde hauetakoak dira ikasle gehien hartuko dituzten unibertsitateak, ordenan: Italia (70), Frantzia eta Portugal (43 bakoitzak), Alemania (37), Txile (36), Polonia (33), Argentina (22), Mexiko (21), Belgika (18), Txekiar Errepublika (16), Suedia (17), Finlandia (14), Estatu Batuak (12), Eslovenia (11), Hungaria, Errumania eta Herbehereak (10 bakoitzak), Brasil (9) eta Austria, Kolonbia eta Danimarka (8 bakoitzak).
Hauek dira ikasleak hartuko dituzten gainerako herrialdeak, ordena alfabetikoan: Australia, Bolivia, Brasil, Bulgaria, Kanada, Txina (Herri Errepublika), Txina Taipei, Hego Korea, Kroazia, Kuba, Ekuador, El Salvador, Eslovakia, Estonia, Grezia, Honduras, Irlanda, Letonia, Lituania, Madagaskar, Malta, Paraguai, Erresuma Batua, Suitza, Turkia eta Uruguai.
Mugikortasun programak
Ikasketak atzerrian egiten dituzten Nafarroako Unibertsitate Publikoko ikasle gehienek Erasmus programan hartzen dute parte (Europar Batasunaren prestakuntza programa, goi mailako hezkuntzaren esparruan lankidetza bultzatzekoa).
Palafox da bigarren programa, NUPek berak sortua Latinoamerikako unibertsitateekin ikasleak trukatzeko. Programa horren bitartez, ikasketen parte bat Iberoamerikako unibertsitate batean egin daiteke, ikasleek bermea izanik, betiere, aldi horretan erdietsitako kredituak aitortuko zaizkiela itzultzen direnean. NUPen nazioarteko beste programa bat Martín de Rada izenekoa da, bere baitan Nafarroako Unibertsitate Publikoaren eta Asiako zenbait unibertsitateren arteko aldebiko hitzarmenak biltzen dituena.
Programa horietaz gainera, Estatu Batuetako, Australiako edo Kanadako unibertsitate batzuekin izenpetutako aldebiko hitzarmenak ditugu. Eta, azkenik, ISEP USA dugu, Estatu Batuetako unibertsitateekin ikasleak trukatzeko aukera eskaintzen duena, eta ISEP Nazioartekoa.